Tag: စကြာဝဠာ
အပူဒါဏ်ကြောင့် ပြန့်ထွက်သွားသော အတွေးများ
ပူတယ် ပူတယ်နဲ့၊ ခုတလော စင်ကာပူမှာ တအားပူပါတယ်။ ညဘက်အိမ်မှာလဲ ပူတယ်၊ နေ့ဘက်ရုံးမှာလဲ ထမင်းထွက်စားရင် ပူတယ်။ အိမ်က အဲယားကွန်းကလဲ တနေ့က အိမ်ရှင် အပူအအေး လာညှိသွားတာ အရင်လိုမအေးတော့ဘူး။ ပန်ကာလေထက် သာတယ်ဆိုရုံလောက်ဘဲ။ ရုံးကလွဲရင် ရထားပေါ်မှာ နဲ့ ကားပေါ်မှာလောက်ဘဲ အအေးဓါတ်ကို ခံစားရတယ်။
ဒါနဲ့တနေ့က အပူဒါဏ် ရှောင်ရအောင်ဆိုပြီး ရုပ်ရှင်သွားကြည့်မိတယ်၊ မင်းသားကလဲ နာမည်ကြီးဆိုတော့ ကြည့်ကောင်းမှာဘဲလေ ဆိုပြီးကြည့်ဖြစ်ပါတယ်၊ အပူဒါဏ်တော့ သက်သာသွားပါရဲ့ ဒါပေမယ့် ရင်ထဲ မကောင်းဘူး ဖြစ်သွားတယ်။ ဟိုရောက် ဒီရောက်လဲ တော်တော်စဉ်းစားသွားမိတယ်။
ဇတ်လမ်းကတော့ တိုတိုပြောရရင် ကမ္ဘာပျက်တဲ့ အကြောင်းလေးပါ။ လူတွေ လူတွေ ရုပ်ရှင်ကို အက်ရှင်မျိုးစုံ ရိုက်လာကြတာ စစ်ပွဲတွေ သဘာဝဘေးအန္တရယ်တွေ နောက်ဆုံးတော့ ကမ္ဘာကြီးကို မီးလောင်တိုက် သွင်းလိုက်ကြတော့တာဘဲ။
ဇတ်ကားကြည့်နေရင်း ဖြတ်ခနဲ ဖြတ်ခနဲ ဘုရားဟောထားတာလေးတွေလဲ သွားသွားသတိရမိပါရဲ့။ ငယ်ငယ်တုန်းကထဲကပါ မှတ်သားမိတာလေးပေါ့ ကျုပ်တို့ကမ္ဘာကြီးဟာ နောက်ဆုံးတော့ မီးလောင်ပြီး ပျက်စီးမယ် နောက်တော့ လူသားတွေပြန်ဖြစ်ပေါ်လာပြီး ဘုရားပွင့်ဦးမယ်။ ငယ်ငယ်တုန်းကတော့ ဒါကို ပုံပြင်လိုဘဲ ဖတ်မှတ်လာခဲ့တာ။ ခုတော့ စဉ်းစားကြည့်ရင် ကမ္ဘာကြီးတစ်ခုလုံး ပျက်စီးဖို့ဆို ခုရုပ်ရှင်ထဲကလို မီးလောင်သွားမှဘဲ ဖြစ်နိုင်မယ်။
မင်းသားပြောသွားတဲ့ စကားတစ်ခွန်းပါတယ် "Everything has purpose" တဲ့။ ကျွန်တော်တို့ ဘုရားကလဲ ဟောသွားတယ်မဟုတ်လား အကြောင်းတရားကြောင့် အကျိုးတရားဖြစ်လာတာ ဆိုတာလေ။ ငယ်ငယ်ကထဲက မှတ်သားခဲ့ဖူးတာက ကျွန်တော်တို့ဘုရားဟာ ရှေ့ကိုအဝေးကြီး ကြိုမြင်ပြီး ဟောထားခဲ့တယ်ဆိုတာ ပွင့်ပွင့်လင်းလင်းပြောရရင် မိရိုးဖလာမို့ ယုံထားလိုက်တာဘဲရှိတယ်။ ကိုယ်လဲ မကြုံတွေနိုင်တော့ စိတ်ထဲ သိပ်အများကြီးမထားဘူး။ ခုနောက်ပိုင်းဆို သိပ္ပံပညာရှင်တွေတောင်မှ ဗုဒ္ဓဘာသာကို လေ့လာနေတယ်လို့ ကြားနေရတယ်။ သူတို့တွေ့ရှိချက်တွေကို ကျွန်တော်တို့ ဗုဒ္ဓဘုရားက ကြိုဟောထားတာများကို ဖြေးဖြေးချင်း သိလာတာကြောင့်လို့ ပြောတာဘဲဗျ။