အိမ်ခန်းငှားစားကြမလား (၂)

စီးပွားဖြစ် အိမ်ခန်း ငှားစားနေတဲ့ အသိုင်းအဝိုင်း သီးသန့်ရှိပါတယ်။ သူတို့မှာ အိမ်လေးငါးလုံးလောက် စင်ကာပူလူမျိုး အိမ်ရှင်တွေဆီကနေ ငှားထားကြပါတယ်။ ပြီးတော့မှ myanmarroom.com မှာဖြစ်ဖြစ် စီးတီးဟောက ဗမာဆိုင်တွေမှာ ကြော်ငြာလို့ ဖြစ်ဖြစ် အငှားပြန်ချကြပါတယ်။ များသောအားဖြင့် တစ်ခန်းကို သုံးယောက်နေကြရတာများပါတယ်။ တချို့အိမ်ရှင်တွေက တပါတ်လျှင်တစ်ကြိမ် သူ့စရိတ်နဲ့သူ အိမ်သန့်ရှင်းရေးလုပ်ဖို့ လူလွှတ်ပြီး အိမ်လာရှင်းပေးပါသေးတယ်။ တချို့ကတော့ အဲဒီဝန်ဆောင်မှုမပါပါဘူး။ ထုံးစံအတိုင်း အိမ်ငှားတွေကဘဲ အပါတ်စဉ် အလှည့်ကျ အိမ်သန့်ရှင်းရေးလုပ်ရပါတယ်။ တချို့ဆို ကွန်ဒိုကအခန်းတွေပါ ငှားထားပြီး အငှားပြန်ချကြပါတယ်။

ဈေးများများနဲ့ မိထားတဲ့အိမ်၊ နေရာထိုင်ခင်းကောင်းတဲ့အိမ်၊ ရထားဘူတာနီးပြီး ဈေး၊ စားသောက်ဆိုင် စတာတွေနဲ့ပါနီးတဲ့ အိမ်မျိုးဆိုလျှင် လူနဲနဲကျပ်တတ်ပါတယ်။ ငှားထားရတဲ့ဈေးကကို များနေတဲ့အတွက် ကိုက်အောင် လူကိုများများတင်ရတဲ့ သဘောပါ။ တချို့အိမ်မျိုးမှာဆိုရင် ထမင်းစားခန်းလိုဖွဲ့လို့ရတဲ့ အခန်းမှာပါ လိုက်ကာ ကာထားပြီး လူနှစ်ယောက်သွင်းပါသေးတယ်။ သူတို့ကျတော့ Air Con မပါဘူးပေါ့။ အဲဒီအတွက် ပန်ကာထားပေးထားပြီး သူတို့ကိုတော့ Air Con မပါတဲ့ ဈေးတစ်မျိုးနဲ့ ယူတတ်ပါတယ်။ ဈေးတစ်မျိုးဆိုပေမယ့်လဲ အနဲဆုံးကတော့ စင်ကာပူဒေါ်လာ ၃၀၀ လောက်ပေးရတာပါဘဲ။ အိမ်တွေက ကျယ်တဲ့အတွက် ဝရန်တာလိုမျိုးနေရာမှာပါ တစ်ယောက်အိပ်ကုတင်တစ်လုံး အေးအေးဆေးဆေး ချထားလို့ရတဲ့အတွက် အဲဒီနေရာမှာပါ လူတစ်ယောက်ထားပါသေးတယ်။

တချို့ကတော့ ကိုယ်တိုင်လဲ အိမ်အငှားပွဲစားပါ တစ်ခါထဲလုပ်ကြပါတယ်။ ကိုယ့်လက်ကအိမ်အတွက် ကိုယ်တိုင်လူရှာသလို သူများမှာ ရှိနေတဲ့အခန်းအတွက်ပါ လူရှာပေးကြပါတယ်။  အခုနောက်ပိုင်း အလုပ်အကိုင်ပါးရှားမှုကြောင့် လူတွေလျှော့တဲ့အထဲ ပါကုန်ကြတဲ့လူတွေ ရှိလာတာကြောင့် အလုပ်အကိုင်ထပ်ရှာလို့မရတဲ့လူတွေအတွက် ပြည်တော်ပြန်ခရီးတွေ ရှိလာတဲ့အခါ၊ အိမ်တွေမှာ နေရာလွတ်တွေ ထပ်ရှိလာပြန်ပါတယ်။ တချို့ဆိုရင် လူပြန်မရမှာစိုးရိမ်ရတဲ့ အတွက် စပေါ်တောင်မတောင်းတော့တဲ့ အိမ်သူကြီးတွေ ရှိလာပါတယ်။ တချို့ကလဲဒီက တရားဝင်နာမည်ရ အိမ်ခြံမြေ အကျိုးတော်ဆောင် ကုပ္မဏီတွေမှာ အလုပ်ဝင်လုပ်ရင်း ဗမာအသိုင်းအဝိုင်းအတွက် ရောင်း/ဝယ်/ငှား သီးသန့် ဝန်ဆောင်မှုတွေပေးတဲ့ လူတွေလဲရှိလာပါပြီ။ နောင်ဆိုရင် ဗမာပြည်က အိမ်ပွဲစားတွေ စင်ကာပူမှာများ အလုပ်လာလုပ်နိုင်ကြမလား တွေးကြည့်မိပါတယ်။

လောကမှာ အကောင်းနဲ့အဆိုး အမြဲဒွန်တွဲနေသလိုပါဘဲ။ အိမ်သူကြီးများရဲ့အနေအထားဟာလဲ အမြဲတမ်း အမြတ်ရပြီး ကောင်းနေကြတာ မဟုတ်ပါဘူး။ လူဆင်းသွားမှာ စိုးရိမ်တတ်တဲ့ အိမ်သူကြီးများက အိမ်ငှားများကို တည့်အောင်၊ ကျေနပ်အောင် ပေါင်းနေကြရတဲ့ လူတွေလဲ အများကြီးရှိပါတယ်။ ကိုယ့်နာမည်နဲ့ စာချုပ်ပြီး ငှားထားတဲ့ အိမ်ဖြစ်တဲ့အတွက် ရဲမှုရဲခင်းနဲ့ ပါတ်သက်လာရင် ရင်ဆိုင်ဖြေရှင်းရမှာက နာမည်ခံထားတဲ့ အိမ်သူကြီးပါ။ ယောကျာ်းလေးတွေချည်းနေတဲ့ အိမ်ဆို ပိုပြီး သတိထားရပါတယ်။ သောက်စားပျော်ပါးပြီး ဆူညံပွက်လောရိုက်နေလို့ ဘေးနီးနားက အခန်းတွေက ရဲကိုလှမ်းတိုင်လို့ အမှုအခင်းဖြစ်ရင် နာမည်ခံပြီး ငှားထားတဲ့ အိမ်သူကြီးကသာလျှင် အရင်ဆုံးဖြေရှင်းရတာပါ။ နောက်ပြီးတော့ အိမ်ရှင်ဆီကို အိမ်လခ မှန်မှန်ပို့နိုင်ဖို့ Pub Bill မှန်မှန်ဆောင်နိုင်ဖို့ စတဲ့ကိစ္စတွေမှာလဲ အိမ်သူကြီးကသာလျှင် ဝီရိယစိုက်ထုပ်ရပါတယ်။ တချို့များ လစာထွက်နောက်ကျလို့ပါဆိုပြီး အိမ်လခပေးတာ နောက်ကျလို့ရှိရင် အိမ်သူကြီးခမျာမယ် အိပ်စိုက်ထားရတာပါဘဲ။ လစဉ်မှန်မှန်ပေးရတဲ့ အိမ်လခကို မတောင်းရင် မပေးသေးတဲ့ အိမ်ငှားမျိုးနဲ့ ကြုံရပြန်ရင်လဲ အိမ်သူကြီးခမျာမှာ အမုန်းခံပြီး တောင်းနေရတော့တာပါဘဲ။

တချို့လဲ ကိုယ့်ပိုက်ဆံနဲ့ကိုယ် အကုသိုလ်အဖြစ်ခံပြီး မေ့ချင်ရောင်ဆောင်နေတတ်တဲ့ အိမ်ငှားမျိုးတွေလည်း ရှိနေတတ်ပါသေးတယ်။ ချက်ပြုတ်စားသောက်ပြီး ဆေးကျောဖို့မေ့သွားတတ်တာ၊ စားလက်စပန်းကန်တွေ မဆေးဘဲ မေ့နေခဲ့တာ၊ အိမ်သန့်ရှင်းရေးလုပ်ရမယ့် ကိုယ့်အလှည့်နေ့မှာ သူငယ်ချင်းအိမ် သွားအိပ်ပြီး အိမ်သန့်ရှင်းရေး စတေးရှောင်တတ်ကြတာ၊ စတဲ့ တစ်ကိုယ်ရည် သိတတ်မှုအသိတရား နည်းပါးကြတဲ့ အိမ်ငှားမျိုးတွေ ပါလာပြန်ရင် အိမ်သူကြီးခမျာမှာ မပြောချင်လျှင် ကိုယ်တိုင်ရှင်းဖို့သာ ရှိပါတော့တယ်။ ရေချိုးဖို့အသွားမှာ သတိတရဖွင့်ရတဲ့ ရေပူပေးစက်ကို ရေချိုးပြီးတဲ့ အခါမှာမေ့ထားခဲ့တတ်ကြတဲ့ အိမ်ငှားမျိုးတွေလဲ ရှိပါသေးတယ်။ မီးဖွင့်မှ မြင်ရမယ့် ရေချိုးခန်းကို ရေချိုးအပြီးမှာ မီးပြန်ပိတ်ဖို့မေ့ခဲ့တတ်တာကတော့ အထူးအဆန်းမဟုတ်လောက်တော့ပါဘူး။ အဆိုးဆုံးကတော့ အိမ်ကနေ အလုပ်အသွားမှာ နောက်ဆုံးထွက်ခွာရသူက အိမ်တံခါးသော့ခတ်ဖို့မေ့ပြီး ထွက်သွားမှာကိုပါဘဲ။

မည်သို့ပင်ဆိုစေကာမူ ပြင်ပမှာ အမြဲနာမည်ကြီးတတ်တာကတော့ အိမ်သူကြီးမကောင်းကြောင်းတွေဖြစ်လို့၊ ဇတ်လမ်းတွေက အမျိုးမျိုးမရိုးနိုင်အောင်ဘဲ ရှိလို့နေပါတယ်။ ကပ်စေးနဲလွန်းတဲ့ အိမ်သူကြီးမျိုး၊ အစစအရာရာ မျက်စိဒေါက်ထောက် လိုက်ကြည့်နေတတ်တဲ့ အိမ်သူကြီးမျိုး၊ တဗျစ်တောက်တောက်ပြောနေတတ်တဲ့ အိမ်သူကြီးမျိုး၊ အရှင်လုပ်ထားတဲ့ ခန်းဆီးလိုက်ကာတန်းတစ်ချောင်း ခန်းဆီးဆွဲရင်း ပြုတ်ကျသွားတဲ့အတွက် အလျှော်တောင်းတဲ့ အိမ်သူကြီးမျိုး အမျိုးမျိုး မရိုးနိုင်အောင် ကြားရတတ်ပါတယ်။ ဗမာအိမ်သူကြီးဖြစ်ပြီးတော့ တရုတ်အိမ်လို ကျင့်ကြံချင်သူများလဲ ရှိပါသေးတယ်။ ဟင်းကို နှစ်ခွက်ထက်ပိုမချက်ရ၊ တစ်ပါတ်မှာ တစ်ကြိမ်ထက်ပိုပြီး အဝတ်မလျှော်ရ၊ နေ့တိုင်းဟင်းမချက်ရ စသဖြင့် အထူးစီမံတွက်ချက်ထားတဲ့ စည်းကမ်းများကိုလဲ ချတတ်ပါသေးသတဲ့။ ရေများရေနိုင် မီးများမီးနိုင်ဆိုသလို (၁း၆) ၁ အချိုး ၆၊ လူ၆ယောက်ရှိလျင် တစ်ယောက်သာ အိမ်သူကြီးဖြစ်နိုင်တာဆိုတော့ နာမည်ထွက်တာက အိမ်သူကြီးသာ ဖြစ်လို့နေတတ်ပါတယ်။

တကယ်မှာတော့ နှစ်ဦးနှစ်ဖက် မျှမျှတတတွေးတော တတ်ဖို့တော့လိုပါမယ်။ အိမ်သူကြီးဆိုးတဲ့လူနဲ့တွေ့လာတဲ့ အိမ်ငှားကလဲ နောက်အိမ်ရောက်တော့ ကိုယ့်ကိုအနိုင်မကျင့်ရဲအောင် ကြိုတင်အပေါ်စီးက နေကြတဲ့လူတွေလည်း ရှိပါတယ်။ အိမ်ငှား နှိပ်စက်တာကို ကြုံခဲ့ဖူးတဲ့ အိမ်သူကြီးကြတော့လဲ အတွေ့အကြုံအရ ဘယ်လိုတင်းကျပ်ထားမှ အလုပ်ဖြစ်တော့မယ်ဆိုပြီး တွေးမိကြတာဆိုတော့ သူသူကိုယ်ကိုယ် အပြစ်တော့မဆိုသာပါဘူး။

အဲဒီလို ဗမာအိမ်ငှားရပ်ကွက်က သတင်းတွေကိုကြောက်လို့ အေးအေးလူလူနေချင်ကြသူတွေက တရုတ်အိမ်၊ ဒါမှမဟုတ် တခြားနိုင်ငံခြားသားနဲ့ တွဲနေကြတဲ့သူတွေ ရှိပါတယ်။ ဗမာပွဲစားတွေထဲမှာလဲ အဲဒီလို တရုတ်အိမ်ကိုမှ ငှားပေးတဲ့ ဗမာအိမ်လုံးဝမကိုင်တဲ့ အိမ်ပွဲစားတွေလဲ သီးသန့်ရှိပါတယ်။ အဲဒီလို နိုင်ငံခြားသားနဲ့ နေမယ်ဆိုရင် ချက်ပြုတ်မစားချင်တဲ့ ယောကျာ်းလေးတွေဘဲ အဆင်ပြေတတ်ပါတယ်။ ချက်ပြုတ်စားဖို့လိုတဲ့၊ ချက်ပြုတ်စားမှ အာသာပြေတဲ့ ဗမာတွေအတွက်တော့ အဆင်မပြေလှပါဘူး။ အငှားဈေးနှုန်းကတော့ အံ့သြလောက်စရာကောင်းအောင် သက်သာပါတယ်။ Master Room ကို ပုံမှန်ဗမာဈေးကွက်မှာ ရေမီးအပြီးအစီး ၈၀၀ လောက်ပေးနေရချိန်မှာ တရုတ်အိမ်မှာ နေလျင် ၅၀၀/ ၆၀၀ လောက်နဲ့ရတတ်ပါတယ်။ Common ခန်းဆိုလျှင်တော့ ၄၀၀ လောက်နဲ့ရနိုင်ပါတယ်။ သူတို့နဲ့နေရင်တော့ Lite Cooking ဘဲလုပ်ခွင့်ရမှာပါ။ Lite Cooking ဆိုတာက ညှော်မလုပ်တဲ့ ရိုးရိုးဟင်းချက်ပုံစံလို့ မထင်လိုက်ပါနဲ့၊ ခေါက်ဆွဲပြုတ်လောက်၊ အပြင်ကဝယ်လာတဲ့ဟင်းကို အပူပြန်ပေးရုံလောက်ကိုသာ ပြောတာပါ။ မိန်းခလေးတစ်ချို့လဲ အဲဒီလို တရုတ်အိမ်မှာ ပေါင်းပြီးနေဖူးကြသူတွေရှိပါတယ်။ များသော အားဖြင့် မိန်းခလေးဆိုလျှင်နေဖို့ အဆင်မပြေတာ များပါတယ်။ ချောင်းကြည့်ခံရတာတို့ စူးစိုက်ကြည့်ကြတာတို့၊ အိပ်ခန်းတံခါးလာခေါက်တတ်တာတို့ စတဲ့ ဇတ်လမ်းတွေကလဲ တိုးတိုးတိတ်တိတ် ပျံ့လွင့်လို့နေပါတယ်။

 (ဆက်ပါဦးမယ်…)

အပိုင်း(၁)

အပိုင်း(၃)

Tags : ,
11,220 views